Kreditua

Kredituak, kreditu-kontuak, kreditu-lerroak, kreditu-polizak edo kredituko kontu korronteak ere deituak,  gehienezko diru-kopuru bat kreditu-hartzaile baten eskura jartzen diren finantza-eragiketak dira, hartzaileak kopuru horretatik nahi duen dirua erabil dezan. Orokorrean, diru kopuru hori kontu berezi batean (kreditu-kontuan edo kreditu-polizan, alegia) jartzen da, kreditu-hartzaileak behar duenean kontu horretatik ordainketak egiteko, interesen trukean. Likidezia emateko erabiltzen da, eta orokorrean berritu egin daiteke epemugaren bukaeran.

Kredituak eta maileguak bereizi beharra dago: maileguetan diru-kopuru jakin bat, oso-osorik uzten zaio hartzaileari, baina kredituetan diru-kopuru batetik nahi edo behar duena soilik hartzen da. Beraz, maileguetan ez bezala, interesak erabilitako diru-zatiagatik soilik ordainduko dira kredituetan, komisioak aparte, eta ez eskura jarritako diru-kopuru osoagatik (hala ere, kredituetan ere posible da kredituaren zenbateko osoagatik interes txiki bat ordaindu behar izatea). Halaber, epemugan erabilitako dirua bakarrik itzuliko da, maileguan utzitako diru-kopuru osoa itzuli behar den bitartean.