Balio-galera fisikoa, funtzionala eta ekonomikoa

Balio-galera edo balio-galtzea ondasun edo aktibo batek denboran zehar, zehatzago bere bizitza erabilgarrian zehar, jasaten duen balioaren gutxitzea da. Balio galerarako arrazoi zenbait daude:

• Balio galera fisikoa dela esaten da aktiboaren higatzea denboraren poderioz gertatzen denean; adibidez, eraikinak, makinak eta gailuak maiztu, xahutu eta hondatu egiten dira denboran zehar.
• Balio galera funtzionala da, aktiboa gehiago edo gutxiago erabiltzeagatik sortzen den higatzearen ondoriozkoa, eta beraz kostu aldakor gisa hartu behar dena.
• Balio galera ekonomikoa sortzen da aktiboaren baliagarritasuna kolokan dagoenean, baina ez higatzeagatik, baizik eta merkatuan izandako aldaketengatik (ordezko piezak eskuratzeko zailtasuna) edota efizientzia murritzagatik. Aipatutako arrazoi horiek obsoleszentzia kontzeptuan biltzen dira. Balio galera funtzionala ondasuna egin beharreko lana egiteko nahikoa ez denean ere gertatzen da, eta orduan gutxiegitasun edo insufizientzia deitzen zaio.
• Balio galera beste arrazoiengatik gertatzen da; esaterako, ondasun higiezinen kasuan, merkatuan ondasun higiezinen merkatu balioa jaitsi delako, edota eraikinaren inguruan beste eraikin batzuk eraiki direlako.

Balio galera fisikoa eta funtzionala amortizazio ekonomikoaren bitartez jasotzen da kontabilitatean.

Hiztegia: ingelesez, depreciation; gaztelaniaz, depreciación.